Gikumpirma sa militar nga hingpit ng nabungkag ang North Eastern Mindanao Regional Committee kon (NEMRC) sa New People’s Army (NPA) human mingsurender sa otoridad sa gobyerno ang mga nahibiling miyembro niini.
Kahinumduman nga kaniadtong Mayo 27, nibalik sa sabakan sa balaod ang tulo ka miyembro sa Regional Central de Grabidad (RCDG) sa NEMRC, uban ang mga armas ug bala, ngadto sa 401st Infantry Brigade nga nahimutang sa Prosperidad, Agusan del Sur.
Ang pagtahan sa mga rebelde gihulagway nga epekto sa grabeng demoralisasyon sa han-ay sa NPA, ilabina human mamatay sa engkwentro niadtong Mayo 11 ang ilang lider nga si Edelberto Daval, nga nailhan usab sa mga alyas nga “Wakol.”
Si 401st Brigade Acting Commander, Colonel Glenn Joy Aynera, nagkanayon nga boluntaryo ang pagbalik-loob sa mga kanhi-NPA ug gipahayag nila ang ilang suporta sa mga programa sa panggamhanan alang sa kalinaw ug kalambuan.
Sa pagkakaron, gipasalig sa panggamhanan ang padayon nga pagtabang sa mga kanhi rebelde pinaagi sa Enhanced Comprehensive Local Integration Program (E-CLIP) ug uban pang peace-building initiatives.