Mokabat na sa napulo’g-lima ka libo (15,000) ang gidaghanon sa mga narehistrong negosyo sa lalawigan sa Bukidnon, bisan pa man sa giatubang nga krisis sa ekonomiya sama sa inflation ug operational cost.
Sa pakighinabi sa Bombo Radyo Malaybalay ngadto kay Malaybalay City Bankers Association President Ronelle Pama, iyang gipahayag nga nagpabiling lig-on ang sektor sa agrikultura, agro-enterprise, ug ecotourism tungod kay giila kini nga mga essential industries sa probinsya.
Apan, giangkon ni Pama nga dako gihapon ang epekto sa serye sa pagsaka sa presyo sa lana ngadto sa manufacturing sector, logistics, ug livestock industry tungod sa pagsaka sa gasto sa transportasyon ug farm inputs. Gipasidan-an sa opisyal nga kon magpadayon ang maong sitwasyon, posibleng mameligro ang operasyon sa mga micro ug small enterprises sa Bukidnon ilabina kadtong adunay limitado nga kapital ug walay igong support system.