Giklaro ug gihimakak sa mga nag-unang opisyal sa nasudnong kagamhanan nga wala pa sila’y nadawat nga bisan unsang opisyal nga dokumento o pormal nga komunikasyon gikan sa International Criminal Court (ICC) kalabot sa giingong warrant of arrest batok kang Senador Christopher “Bong” Go.
Ang maong katin-awan miguwas taliwala sa mibuto nga pamahayag ni Davao City 1st District Representative Paolo “Pulong” Duterte, kinsa mi-angkon nga duna matod pa siya’y “highly reliable source” nga nagpahibalo kaniya bahin sa paggawas sa maong kamanduan sa pagpadakop batok sa senador ug duha ka kanhi opisyal sa pulisya.
Apan hugot kining gibarugan ni Philippine National Police (PNP) Chief Jose Melencio Nartatez Jr. nga nagsubay lamang sila sa pormal nga proseso ug beripikadong impormasyon, ug dili sa mga hungihong o mga post sa social media. Gipaluyohan usab kini nilang Interior Secretary Jonvic Remulla ug National Bureau of Investigation (NBI) Director Melvin Matibag kinsa parehong nagkanayon nga “zero” o walay bisan usa ka opisyal nga papel nga miabot sa ilang tagsa-tagsa ka buhatan kalabot sa maong isyu.