Nadiskubre sa mga minero sa Myanmar ang usa ka dako kaayong talagsaong ruby nga giisip karon nga ikaduhang pinakabug-at nga ruby nga nakaplagan sa maong nasud, sumala sa report sa state media niadtong Biyernes.
Ang maong ruby adunay gibug-aton nga 11,000 carats o mokabat og mga 2.2 ka kilo ug nakaplagan duol sa lungsod sa Mogok sa upper Mandalay region nga nailhan isip sentro sa industriya sa pagmimina sa mahalong bato sa Myanmar.
Base sa report sa state-run nga Global New Light of Myanmar, nadiskubre ang rough ruby niadtong tunga-tunga sa Abril human sa tradisyonal nga pagsaulog sa Bag-ong Tuig sa nasud.
Bisan pa man nga katunga lamang kini sa gibug-aton sa 21,450-carat ruby nga nakaplagan niadtong 1996, giingong mas bililhon ang bag-ong nadiskubreng bato tungod sa mas taas nga kalidad ug kolor niini.
Gihulagway ang ruby nga adunay purplish-red nga kolor nga adunay gamayng yellowish undertones, taas nga color grade, saktong transparency, ug sinaw nga reflective surface.
Nailhan ang Myanmar isip gigikanan sa halos 90 porsyento sa ruby sa tibuok kalibutan, ilabina gikan sa mga lugar sa Mogok ug Mong Hsu.
Apan, nagpabilin nga kontrobersyal ang gemstone industry sa nasud gumikan sumala sa pipila ka human rights groups lakip ang Global Witness, usa kini sa dagkong tinubdan sa kita sa militar sa Myanmar pinaagi sa pagbaligya sa mahalong mga bato.