Posibleng mangayo si Acting Senate President Sherwin Gatchalian og special Senate session kang Pangulong Ferdinand Marcos Jr. aron humansa mga nalangay nga mga legislative agenda tungod sa sunod-sunod nga pag-ilis sa liderato sa Senado sa miaging mga semana.
Matud ni Gatchalian, kasamtangan nilang gihuman ang listahan sa mga sugyot balaodnon ug appointments nga wala naasikaso og kung aprobahan sa Malacañang ang special session.
Lakip sa ilang gipaningkamotan ang pagkumpirma sa pipila ka opisyal sa Armed Forces of the Philippines o AFP, ilabina ang lima ka heneral nga posible maapektuhan sa pagkalangan sa deliberasyon sa Commission on Appointments o CA.
Sumala ni Gatchalian nga dili lamang kini simpleng administrative delay apan adunay direktang epekto sa operasyon sa gobyerno, labi na sa mga uniformed personnel nga naghulat sa kumpirmasyon sa ilang promosyon.
Sa kasamtangang sitwasyon, wala pa gihapon hingpit nga naporma ang Commission on Appointments ug pipila ka Senate committees human sa daghang pagbag-o sa liderato sa Senado gikan Mayo hangtod Hunyo.
Tungod niini, nagkadako ang panawagan sa pipila ka sektor sa Senado nga gamiton sa Presidente ang iyang gahum sa pagpatawag og special session aron mapadayon ang mga wala na lihok nga trabaho sa lehislatura.
Samtang, sumala sa Malacañang, andam ang Presidente sa maong lakang basta adunay pormal nga hangyo gikan sa Senado ug klarong listahan sa urgent agenda.