Nagtuo si International Criminal Court (ICC) Assistant to Counsel Atty. Kristina Conti nga kinahanglan mo-atubang si kanhing Pangulo Rodrigo Duterte sa Pebrero 23, ang adlaw nga ipadayon ang confirmation of charges hearing sa iyang kaso nga crimes against humanity.
Sumala sa abogado, importante nga personal nga makompronta sa kanhing pangulo ang mga ebidensiya nga ipresentar batok kaniya sa prosecution.
Matud ni Conti, nga kinahanglan magpakita ang pangulo sa maong hearing aron personal nga mapaminaw ug masusi ang mga ebidensiya.
Gidugang pa ni Conti gumikan nga katungod kini sa kanhing pangulo, dako usab nga butang nga makita sa publiko nga iyang atubangon ang iyang kaso sa korte.
Bisan pa niana, nituo usab ang abogado nga kung makakita og rason ang kampo ni Duterte, posible nga dili gihapon siya mo-atubang sa pagdungog.
Gipasabot pa ni Conti nga ang confirmation of charges usa lamang ka evidentiary hearing ug dili pa kini ang tinuod nga paglitis kung diin husayon kung guilty o dili ang kanhing pangulo.