Nakasiguro na og permanenteng pwesto sa main roster sa ONE Championship ang Filipina Muay Thai star nga si Islay Erika Bomogao human mapilde pinaagi sa knockout sa ikatulong hugna ang Thai fighter nga si Klinphaka Por Thaisong sa ONE Friday Fights 164 sa Lumpinee Stadium sa Bangkok, Thailand.
Bisan og natumba sa unang hugna, nakabangon si Bomogao ug mibawi pinaagi sa sunod-sunod nga siko ug kusog nga tuo nga kinumo nga mipatumba sa kontra sulod sa 13 ka segundos pa lang sa ikatulong hugna.
Ang maong kadaugan maoy ikalimang sunod nga daog ni Bomogao isip propesyonal ug nagpabiling wala pay kapildihan sa ONE Championship.
Tungod sa impresibong kadaugan, nakadawat usab ang Igorota fighter og performance bonus ug opisyal nga kontrata sa ONE Championship nga nagdala niini ngadto sa main roster sa organisasyon.
Kini na usab ang ikatulong sunod nga performance bonus sa maong atleta.