Gibatikos sa usa ka eksperto sa ekonomiya ang nagpadayong impeachment trial batok kang Vice President Sara Duterte, nga iyang giisip nga usa sa mga hinungdan sa pagkadismaya sa kadaghanan sa katawhan sa mga lihok sa kasamtangang administrasyon.
Matud ni Ray Talimio, Jr. Former Oro Chamber sa Economic Development Committee, RDC-X, gipasabot niini nga adunay pagkunhod sa trust rating sa presidente sa nasud samtang misaka ang kang VP Sara Duterte bisan pa sa mga lakang sa prosekusyon nga nagtinguha sa pagdaot sa imahe sa bise presidente.
Subay niini, bulgarang gitawag ni Ray Talimio Jr. nga nagpakabuta-bungol ang Kongreso sa sentimyento sa katawhan, tungod kay mas gipaningkamotan matud pa sa mga mambabalaod nga mapanalipdan ang ilang politikal nga kaugmaon batok sa posibleng paglingkod ni Vice President Sara Duterte isip sunod nga presidente sa nasud human sa 2028.
Gikabalak-an usab niini ang kahimtang sa ekonomiya sa nasud tungod sa padayong panagbangi sa politika, diin gikahadlokan niyang mahimong magpabilin ang siklo sa panimalos tali sa nagkadaiyang administrasyon.
Matud ni Talimio, kon magpadayon ang sobra nga pagpokus sa politika inay sa kalambuan, posibleng malabwan pa sa ekonomiya sa ubang nasud sama sa Myanmar, Laos ug Cambodia ang Pilipinas.