Usa ka lalaki nga taga-Netherlands ang mibisita karon sa Pilipinas, dili aron maglingaw-lingaw isip turista, kundi aron itanyag ang iyang serbisyo isip usa ka sperm donor.
Giila ang maong langyaw nga si Jonathan Jacob Meijer, kinsa nailhan na sa tibuok kalibutan tungod sa iyang tinguha nga makatabang sa mga magtiayon o mga babaye nga gustong makabaton og anak. Matod pa, gatusan na ka mga bata sa nagkadaiyang nasod ang iyang nahimong anak pinaagi sa maong proseso.
Bisan pa man niini, ang iyang gibuhat nagdala og nagkadaiyang reaksyon ug kontrobersiya, ilabi na bahin sa legalidad ug sa gidaghanon sa iyang nahimong anak sa tibuok kalibutan. Ang iyang pagbisita dinhi sa nasod nagpakita sa iyang padayon nga misyon sa pagtanyag sa iyang tabang ngadto sa mga Pilipino nga nanginahanglan niini.