KALILANGAN, BUKIDNON– Daling gidala sa balay tambalanan ang duha ka lalaki human ang ilang gisakyang motorsiklo mibangga sa usa ka truck sa Sayre Highway, Purok 2, Barangay Maca-opao, Kalilangan, Bukidnon, niadtong Pebrero 16 sa alas-7:15 sa gabii.
Base sa imbestigasyon sa kapulisan, usa ka pula nga Truck nga gimanehoan sa usa ka 37-anyos nga lalaki ang nagbiyahe paingon sa amihanan nga deriksyon karga ang upat ka kabayo.
Pag-abot sa maong dapit, giingong napa-atras ang truck aron ayuhon ang iyang karga nga mi-okupar na sa pikas lane.Sa samang higayon, midangat ang usa ka itom nga motorsiklo nga gidala sa usa ka 28-anyos nga drayber kauban ang usa ka pasahero.
Matud pa, nakabantay ang pasahero sa motor nga nag-atras ang truck, apan wala na makapahinay ang drayber hinungdan nga nawad-an kini og kontrol ug nibangga sa wala nga bahin sa truck.
Tungod sa kusog nga impact, naguba ang atubangan sa motor ug nakaangkon og samad ang drayber niini, samtang anaa na sa luwas nga kahimtang ang iyang backride.
Ang mga biktima daling gidala sa Bukidnon Provincial Hospital sa Kalilangan.
Kasamtangan, ang drayber sa truck lakip ang duha ka sakyanan anaa na sa kustodiya sa Kalilangan Municipal Police Station alang sa saktong disposisyon.