Gipahugtan karon sa Department of Trade and Industry (DTI) Bukidnon ang ilang price monitoring aron protektahan ang mga konsumidor batok sa iresponsableng pagsaka sa presyo sa mga batakang palaliton.
Sa pakighinabi sa Bombo Radyo Malaybalay kang Junar Merla, Chief sa Consumer Protection Division sa DTI-Bukidnon, gibutyag niini nga nakig-alayon na sila sa nagkadaiyang Local Price Coordinating Councils aron masiguro ang pagsunod sa Suggested Retail Price (SRP). Sa gihimong inspeksyon, pipila ka mga grocery store ang nasuta nga posibleng nakalapas sa SRP, hinungdan nga gi-andaman na kini og Letter of Inquiry (LOI) alang sa katin-awan.
Nasayran nga kapin 200 ka mga produkto ang duna’y SRP nga epektibo hangtod karong Mayo 15. Subay niini, giawhag sa DTI ang publiko nga mag-canvas una sa presyo ug sigurohon ang PS o ICC mark sa mga palitonon. Nanawagan usab ang buhatan sa mga konsumidor nga i-report dayon ang mga establisemento nga nagpahimulos ug nagbaligya og sobra sa gitakdang presyo.