MALAYBALAY CITY – Gibanabana nga mibilang sa kapin 10-mil pesos ang danyos nga nabilin human hingpit nga naugdaw ang duha ka panimalay sa Barangay Maligaya, ning dakbayan, kagahapon sa hapon.
Sa pakighinabi sa Bombo Radyo Malaybalay kang FO3 Brent Clyde Suico sa BFP Bukidnon, nasayran nga nadawat sa ilang buhatan ang tawag pasado ala-una sa hapon. Base sa inisyal nga imbestigasyon, nagsugod ang kalayo sa dirty kitchen sa panimalay ni Emmafe Cose nga paspas nga mikaylap, hinungdan sa total burn-out sa duha ka balay.
Hinuon, gideklarar sa BFP nga wala’y naitalang nasamdan o nakalas sa maong insidente. Sa pagkakaron, padayon pang ginasusi ang eksaktong hinungdan sa sunog apan subling nagpahinumdom si FO3 Suico sa publiko nga likayan ang unattended cooking ug kanunayng susihon ang mga electrical connections aron malikayan ang susamang trahedya.