Gipasidan-an karon sa PAGASA Malaybalay ang tibuok probinsya sa Bukidnon nga mangandam na sa nagsingabot nga hulga sa El Niño nga posibleng mosugod na karong Hunyo hangtod Agosto.
Sa pakighinabi sa Bombo Radyo Malaybalay kang Raul Montilla sa PAGASA, gibutyag niini nga anaa na sa 79 porsyento ang posibilidad nga masinati ang grabeng kainit nga mahimong molungtad hangtod sa sayong bahin sa tuig 2027. Bisan pa man og makasinati pa og mga pag-ulan sa pagkakaron tungod sa Easterlies, gilauman nga mas moubos ang ihapon sa mga bagyong mosulod sa nasud, apan posible nga mas mahimong mapig-oton o kusog ang mamugna nga weather disturbances.
Tungod niini, giawhag sa PAGASA ang publiko, ilabina ang sektor sa agrikultura, nga magdaginot sa tubig ug magmatngon sa pabag-o-bag-ong dagan sa panahon. Sa pagkakaron, gimonitor usab ang duha ka weather disturbances sa gawas sa Philippine Area of Responsibility (PAR) apan gamay ra ang tsansa nga makaapekto kini sa nasud.