Walay nadawat ang Department of Social Welfare and Development (DSWD) Region 10 nga audit observation memorandum gikan sa Commission on Audit (COA) kalabot sa posibleng pagdoble sa ayuda ubos sa Assistance to Individuals in Crisis Situation (AICS).
Matud sa opisyal nga si Rosheil Galia ang Regional Information Officer DSWD Region 10, sa padayon ang pagmonitor sa pagpatuman sa programa aron masiguro nga husto ang paghatag sa pinansyal nga tabang.
Lakip sa mga gitutokan sa programa ang pagtabang sa mga kabus nga pasyente ug pamilya nga nagkinahanglan og pinansyal nga suporta alang sa tambal ug paglubong.
Giklaro sa opisyal nga ang AICS gitumong sa pagtabang sa mga indibidwal ug pamilyang nag-atubang og krisis, ug dili kini angay isipon nga kanunayng tinubdan sa pinansyal nga tabang.
Gawas sa medical ug burial assistance, naghatag usab ang programa og tabang sa transportasyon sa piho nga mga kahimtang, sama sa mga biktima sa pagpangulata ug pagpahimulos.
Dugang pa, nagpatuman ang DSWD og nagkalainlaing programa nga nagtumong sa pagpalambo sa panginabuhian sa mga benepisyaryo.
Pinaagi sa mga sesyon sa pagpalambo sa pamilya ug uban pang giya, gidasig ang mga benepisyaryo nga pauswagon ang ilang panginabuhian ug kahibalo sa pagdumala sa panalapi.