Gipalapdan sa Department of Social Welfare and Development (DSWD) ang suporta sa mga lumad ug ubang komunidad sa Barangay Adtuyon, Pangantucan, Bukidnon pinaagi sa livelihood assistance ubos sa PAMANA Program aron mapalig-on ang ilang panginabuhian ug tinubdan sa kita.
Matud ni DSWD Secretary Rex Gatchalian, kabahin kini sa mando ni Presidente Ferdinand Marcos Jr. nga maseguro nga walay komunidad, ilabina ang mga indigenous peoples (IP), nga mabiyaan sa kalamboan.
Samtang, giila usab sa mga benepisyaryo ang dakong tabang sa programa, ilabina sa mga pamilyang nagsalig sa panginabuhian aron masuportahan ang pag-eskwela sa ilang mga anak ug uban pang panginahanglan.
Gibutyag usab sa kapitan sa Barangay Adtuyon nga siyam na ka asosasyon ang nakadawat og P300,000 matag usa, samtang duha pa ka asosasyon ang gipaabot nga maapil sa programa.
Matag asosasyon adunay kapin sa 15 ka miyembro, kadaghanan mga lumad.
Gawas sa pinansyal nga tabang, gipasiugda usab ang kahinungdanon sa pagpalambo sa mga produkto sa lumad pinaagi sa pagpamaligya niini, lakip na sa social media, aron mas daghan pang mamalitay ang maabot.