Gikatakdang ilusad sa Department of Social Welfare and Development Field Office 10 (DSWD-10) ang Cash Relief Assistance (CRA) alang sa mga tricycle driver karong Abril 8, 2026.
Ubos sa programang Assistance to Individuals in Crisis Situation (AICS), ang mga kwalipikadong benepisyaryo makadawat og one-time nga cash grant nga mobalor og ₱5,000 aron makatabang sa pagsaka sa presyo sa lana.
Ang dungan nga pagpay-out pagahimoon sa walo ka mga dagkung siyudad sa rehiyon, lakip na ang Cagayan de Oro, El Salvador, Gingoog, Malaybalay, Valencia, Ozamiz, Tangub, ug Oroquieta.
Samtang, ang Iligan City dili maapil sa maong payout tungod sa kakuwang sa lokal nga istruktura sa Tricycle Operators and Drivers Association (TODA) sa ilang sistema sa transportasyon.
Sa pakighinabi sa Bombo Radyo Malaybalay, ngadto na kang Roshiel M. Galia, ang Regional Information Officer sa Department of Social Welfare and Development Field Office 10 (DSWD-10), gibutyag niini nga ang mga traicycle drivers o drayber sa rela ang unang hugna nga makadawat sa maong ayuda.
Aron masiguro ang hapsay nga pagpang-apod-apod, ang listahan sa mga benepisyaryo kinahanglan nga beripikado sa ilang tagsa-tagsa ka Local Government Units (LGUs).
Gikumpirma usab niini nga moabot sa gibana-banaang 9,888 ka mga drayber ang gikatakdang makadawat og tabang pinansyal gikan sa kagamhanan.
Ang maong ayuda gilauman nga makatabang sa pagpagaan sa kalisod nga nasinati sa mga drayber taliwala sa nagpadayong mga krisis sa ekonomiya.
Gisiguro usab sa DSWD-10 nga ang tanang naa sa lista mga kwalipikado ug tinuod nga drayber base sa pagpamatuod sa ilang tagsa-tagsa ka lokal nga panggamhanan.