Giklaro sa DSWD-10 nga nakadawat na og burial assistance ang inahan nga namatyan og anak nga PWD sa wala pa mibuto sa social media ang isyu kalabot sa 50 pesos nga giingong nadawat niini gikan sa lokal nga panggamhanan sa San Fernando, Bukidnon.
Matud ni Roshiel M. Galia, Regional Information Officer sa Department of Social Welfare and Development, Region-X niadtong Oktubre 7, miduol na sa satellite office sa ahensya sa Valencia City ang inahan nga si Robie Ondil diin gihatagan kini og guarantee letter aron makatabang sa bayranan sa punerarya.
Gipasabot usab sa ahensya nga nakigtambayayong ang Valencia City LGU pinaagi sa pag-abag sa nahibiling balanse sa bayranan sa punerarya.
Giklaro sa DSWD-10 nga nahitabo ang paghatag sa assistance sa wala pa mikaylap sa social media niadtong Nobyembre 10 ang post kalabot sa giingong 50 pesos lamang nga burial assistance nga nadawat sa inahan.
Taliwala niini, padayon gihapon ang paghatag sa DSWD og medical, burial ug uban pang matang sa pinansyal nga tabang ilalom sa Assistance to Individuals in Crisis Situations o AICS program, tungod kay aduna pa silay igong pondo alang sa maong mga serbisyo.
Gipahibalo usab sa ahensya nga magpadayon ang operasyon sa upat ka satellite offices niini sa probinsya sa Bukidnon aron mas mapaduol sa katawhan ang ilang mga serbisyo.

