Giklaro sa Department of Justice (DOJ) nga ilang hulaton ang resolusyon sa Korte Suprema sa dili pa sila molihok sa higayon nga mogawas ang arrest warrant gikan sa International Criminal Court (ICC) batok kang kanhi Presidente Rodrigo Duterte ug sa iyang mga kauban.
Matod ni Atty. Paul O. Martinez, spokesperson sa DOJ, importante nga tun-an og maayo ang legalidad niini ubos sa Republic Act 9851. Ubos sa Section 17 sa maong balaod, mamahimong i-extradite ang usa ka akusado ngadto sa international court, apan kinahanglan kining e-balanse sa interpretasyon sa Korte Suprema sa atong Batakang Balaod.
Kahinumdoman nga ang kampo ni Duterte nagduso og petisyon sa labing taas nga hukmanan aron kuwestiyonon ang legalidad sa pagdakop ug pagdala kaniya ngadto sa The Hague, Netherlands.
Bisan pa man niini, giangkon sa DOJ nga gawas sa desisyon sa korte, ilaha usab nga gikonsiderar ang obligasyon sa Pilipinas isip miyembro sa Interpol. Lakip sa mga gipangalanan sa ICC isip “co-perpetrators” sa war on drugs mao sila si, Senator Bato dela Rosa, Senator Bong Go, Former Justice Secretary Vitaliano Aguirre II, ug uban pa.