Gibutyag ni Department of the Interior and Local Government (DILG) Secretary Jonvic Remulla, nga wala pa siyay impormasyon kung tinuod bang adunay gipagawas nga arrest warrant ang International Criminal Court batok kang Senador Ronald “Bato” Dela Rosa.
Mao kini ang iyang tubag human migawas ang mga taho niadtong Sabado, Mayo 9, nga adunay na giingong warrant nga gipagawas sa international tribunal.
Matud ni Remulla, hangtod nga wala pa niya makita ang opisyal nga kopya sa maong warrant, hearsay pa lamang kini.
Gipahibalo usab niini nga nag-andam na ang DILG og 10,000 ka task force personnel alang sa dragnet operations kon mapagawas ang warrant of arrest batok sa senador.
Sa pagkakaron, padayon pa ang pagporma sa maong task force.
Gibutyag usab ni Remulla nga si Dela Rosa anaa karon sa Davao Region.
Una nang gihisgutan si Dela Rosa isip usa sa giingong co-perpetrators ni kanhi Pangulong Rodrigo Duterte sa kaso nga may kalabotan sa war on drugs.
Base sa mga dokumentong gisumite sa prosekusyon, giingong adunay “common plan” si Duterte ug ang mga kauban niini aron i-neutralize ang giingong mga kriminal pinaagi sa bayolenteng mga aksyon lakip na ang pagpamatay.
Kahinumduman nga si Dela Rosa maoy nagsilbing hepe sa Philippine National Police sa dihang gilunsad ang kontrobersyal nga kampanya batok sa ilegal nga droga pinaagi sa Oplan Tokhang ug Oplan Double Barrel Reloaded.