Pipila ka adlaw sa wala pa ang botohan sa House of Representatives of the Philippines kabahin sa impeachment ni Vice President Sara Duterte, sumala ni Senadora Imee Marcos nga adunay giingong “incentive package” alang sa mga kongresista nga mobotar pabor sa impeachment.
Matud sa senadora, lakip sa giingong tanyag ang P5 milyon nga cash, P3 milyon nga dugang Maintenance and Other Operating Expenses (MOOE) matag bulan, ug P150 milyon nga kantidad sa mga proyekto.
Dugang pa niini, posible usab nga mawad-an og budget ug maatubang og kaso ang mga kongresista nga mobotar og “no” o mosupak sa impeachment sa bise presidente.
Apan gipanghimakak kini ni House Committee on Justice Chairperson Gerville Luistro.
Sumala kaniya, wala kini nasinati o nadunggan nga ingong tanyag sukad nagsugod ang impeachment hearings.
Sa pagkakaron, wala pa’y opisyal nga pamahayag gikan sa kampo ni VP Sara, sa Office of the Vice President of the Philippines, ug sa liderato sa Kamara kalabot sa maong alegasyon.