Giklaro ni DILG Secretary Jonvic Remulla nga ang subpoena nga gipadala kang Senador Ronald Dela Rosa usa lamang ka lakang “in aid of investigation” ug dili pa kini nagpasabot og pag-aresto.
Matud sa kalihim, kabahin kini sa padayong case build-up sa Philippine National Police batok sa mga giingong nalambigit sa extrajudicial killings o EJKs atol sa miaging administrasyon.
Gipasiugda usab niiini nga bisan motambong ang senador sa imbestigasyon, wala’y himuong pagdakop.
Gidugang ni Remulla nga walay kalabotan ang maong subpoena sa posibleng warrant of arrest gikan sa International Criminal Court.
Sumala kaniya, molihok lamang ang gobyerno kung adunay klaro ug opisyal nga kopya sa maong warrant.
Ang subpoena gisilbi sa Criminal Investigation and Detection Group sa opisina ni Senador Dela Rosa sa Senado, sa iyang primaryang pinuy-anan sa Davao City, ug sa usa pa ka adres sa Davao del Sur.
Gimandoan si Senador Dela Rosa nga motambong sa imbestigasyon sa Mayo 14, 2026, alas 10 sa buntag sa opisina sa PNP-CIDG sa Camp Crame, Quezon City.
Kinahanglan siyang makigkita kang Police Lt. Col. Jerome J. Baritonton aron motubag sa mga pangutana, mopirma og affidavit, ug mosumite og may kalabotang mga dokumento.
Gipasidan-an usab nga ang dili pagtuman sa subpoena nga walay balidong rason mahimong magresulta sa kasong indirect contempt of court.
Sa kinatibuk-an, ang lakang sa mga otoridad kabahin sa lokal nga imbestigasyon sa nasud ug dili pa konektado sa bisan unsang aksyon gikan sa ICC.