Nagpahigayon og protesta sa atubangan sa House of Representatives ang pipila ka progresibong grupo karong Mayo 11, dungan sa gikatakdang botohan sa plenaryo sa impeachment complaint batok kang Bise Presidente Sara Duterte.
Sayong buntag pa lamang, nagrali na ang mga miyembro sa Akbayan, Makabayan Bloc, ug uban pang progresibong organisasyon aron dasigon ang mga mambabatas nga suportahan ang impeachment complaint.
Sumala kang Akbayan Party-list Representative Perci Cendaña, gilauman nila nga ang mga kongresista mobase sa ebidensya ug sa ilang konsensya sa pagbotar.
Sumala ni Cendaña nga bug-at ang mga alegasyon batok sa bise presidente, lakip ang giingong wala pagdeklara sa yaman, mga giingong transaksiyon sa bangko, ug kwestyonableng paggamit sa confidential funds.
Gihisgutan usab ni Cendaña ang giingong mga pagpanghulga nga may kalabotan sa 2028 elections batok sa mga mambabalaud nga mobotar pabor sa impeachment.
Matod niya, kinahanglan manaig ang kaisog ug baruganan sa mga kongresista sa ilang pagdesisyon.
Sa laing bahin, sigon sa Makabayan Bloc nga panahon na aron atubangon ni Vice President Sara Duterte ang impeachment complaint sa Senado.
Matod kang ACT Teachers Party-list Representative Antonio Tinio, dili na angay likayan sa bise presidente ang maong proseso ug kinahanglan siyang motubag sa mga alegasyon batok kaniya.
Nagpahayag usab kini og pagsalig nga igo ang ebidensyang gipresentar sa House Committee on Justice aron makalusot ang impeachment complaint sa Kamara ug mauswag ngadto sa Senado.
Nagtuo ang duha ka grupo nga makakuha og igo nga suporta ang impeachment complaint sa plenaryo.
Kung maaprubahan kini sa Kamara, pormal nga ipasa ang Articles of Impeachment ngadto sa Senado diin pagadunggon ang kaso isip impeachment court.