Posibleng magkinahanglan ang Department of Agriculture (DA) og dugang P40 bilyones nga pondo kon magpadayon pa ang krisis sa lana.
Sumala ni Agriculture Secretary Francisco Laurel Jr., duna lamang karoy P150 milyones ang ahensya alang sa fuel subsidy ug P10 bilyones gikan sa Presidential Assistance to Farmers and Fishermen.
Bahin sa abono (fertilizer), matud niya nga gikinahanglan ang P30 bilyones. Sa pagkakaron, sumala sa kalihim, katunga na lang ang nabilin sa ilang pondo alang sa abono.
Gikinahanglan usab sa DA ang dugang P20 bilyones alang sa mga mag-uuma sa humay (rice farmers) ug dugang P10 bilyones aron suportahan ang mga mangingisda.
Una nang gibanabana sa DA nga ang pinakagamay nga alkansi (minimum loss) sa mga produkto sa agrikultura moabot sa 20% o katumbas sa duha ka milyon ka metriko tonelada, diin kuwang pa gihapon ang tabang sa gobyerno aron matubag ang epekto sa krisis sa lana.