Gipahibalo sa Department of Agriculture (DA) pinaagi sa Bureau of Plant Industry (BPI) nga nang-apud-apod sila og kapin 60,000 ka mga iggiging ube (purple yam) nga nagkantidad og Php 2.6 milyones ngadto sa mga mag-uuma sa Leyte ug Bohol karong Martes, Hunyo 23.
Kini nga dinalian nga lakang gihimo dungan sa nagkakusog nga pag-ila sa ube isip bag-ong export star sa nasod gumikan sa dako nga demand niini sa gawas sa nasod—sama sa North America, Europe, ug uban pang bahin sa Asia—alang sa mga ube-flavored nga ice cream ug mga pastries. Ang maong ayuda gipanghatag ngadto sa dapit sa 900 ka mga mag-uuma gikan sa kapin 60 ka pundok sa mga dapit nga nailang nag-unang magpapatungha og ube.
Sa Bohol, nakadawat sa maong ayuda ang mga lungsod sa Dagohoy, San Isidro, Lila, Cortes, ug Albuquerque. Samtang sa Leyte, dako sab ang pasalamat sa mga mag-uuma gikan sa Abuyog, Tacloban, Baybay, Bato, Maasin, Ormoc, Carigara, Mayorga, Palompon, Naval, Mahaplag, Kananga, Burauen, Calubian, ug Inopacan. Sumala ni Agriculture Secretary Francisco Tiu Laurel Jr., tumong sa maong programa nga mosaka ang kita sa mga lokal nga mag-uuma ug mapalig-on ang ekonomiya sa nasod pinaagi sa pagsuporta sa mga produkto nga duna’y dako nga potensyal sa merkado sa gawas sa nasod.