Gipahugtan karon sa Department of Agriculture-Regional Field Office 10 (DA-RFO 10) ang pagpasiugda sa paggamit sa mga lokal nga abono isip tubag sa padayon nga pagsaka sa presyo sa commercial fertilizer sa merkado.
Sumala ni DA-10 Director Jose Apollo Pacamalan, tumong niini nga matabangan ang mga mag-uuma nga makadaginot sa gasto sa produksyon samtang gimentinar ang kalidad sa ilang mga ani.
Ubos sa Balanced Fertilization Strategy (BFS), gidasig sa buhatan ang pagsagol sa organic ug inorganic nga abono aron mapabilin ang kahimsog sa yuta. Gipasabot sa DA-10 nga pinaagi sa paggamit sa mga bio-fertilizers ug uban pang lokal nga materyales, dili lang mopaubos ang gasto sa pagpanguma, apan mas mapalig-on usab ang seguridad sa pagkaon sa tibuok rehiyon sa Northern Mindanao.
Sa pagkakaron, padayon ang gihimo nga mga technical briefings ug demonstrations sa DA sa nagkadaiyang dapit sa rehiyon aron tudloan ang mga mag-uuma sa saktong paagi sa paghimo ug paggamit sa mga alternatibong abono.