Gipahibalo sa COMELEC-Malaybalay nga padayon ang ilang pagpangandam alang sa Barangay ug Sangguniang Kabataan Elections (BSKE) nga gitakdang ipahigayon sa Nobyembre 2, 2026, samtang wala pa’y bag-ong balaod nga nag-usab niini.
Sa pakighinabi sa Bombo Radyo Malaybalay kang Comelec Chairman sa Malaybalay City nga si Atty. Danilo Dividina, giulti niini nga ilang gisunod sa pagkakaron mao ang kasamtangang balaod alang sa BSKE.
Gipasabot usab nga ang Kongreso ug Presidente lamang ang makadesisyon sa pag-oktaba ang maong eleksyon.
Samtang, gipasabot usab niini ang ilang papel sa mga reklamo sa vote-buying ug vote-selling nga gikatahong nahitabo atol sa eleksyon. Matud ni Atty. Dividina, dili igo ang mga reklamo lamang sa social media o radyo aron mapadayon ang usa ka kaso sa korte.
Gihimug-atan usab nga adunay kahinungdanon ang panahon kung kanus-a gihimo ang giingong pagpangampanya o vote-buying.
Kung wala pa makapasa og Certificate of Candidacy ang usa ka tawo, dili pa siya mahimong ikonsiderar nga kandidato ubos sa balaod sa eleksyon.