MALAYBALAY CITY, BUKIDNON — Gipasidan-an ni Registered Psychometrician Stella S. Ferrarez nga mahimong mosangpot sa seryosong problema sa mental nga panglawas ang bullying, lakip ang depresyon, paghikog, ug homicidal behavior kon dili kini madapatan og sayong aksyon.
Sa pakighinabi sa Bombo Radyo Malaybalay, gipasabot ni Ferrarez nga ang bullying naglakip sa subsob nga verbal, physical, psychological, o online nga pagpangdaog-daog sa usa ka bata ngadto sa iyang isigka-bata. Matud niya, gawas sa depresyon ug risgo sa paghikog nga masinati sa biktima, ang mga nag-bully usab mahimong magdako nga adunay agresibo ug impulsive nga pamatasan.
Tungod niini, gipasiugda ni Ferrarez ang hinungdanong papel sa pamilya ug Department of Education (DepEd) sa pag-ila sa gamot sa problema ug paghatag og early intervention. Giduso usab niya ang dugang edukasyon alang sa mga ginikanan, magtutudlo, ug kabataan aron maprotektahan ang mga biktima ug malikayan ang mas seryosong epekto sa panghuna-huna sa mga bata.