INTERNATIONAL – Misaka na sa kapin 1,000 ang ihap sa mga nakabsan sa kinabuhi tungod sa grabeng pagbaha ug mudslide sa nasod sa Nepal ug rehiyon sa Tibet kasunod sa pagkahugno sa glacier sa kadukiran sa Himalayas.
Sa labing bag-ong talaan, 1,010 na ang kumpirmadong namatay sa Nepal samtang kapin 3,900 ang nagpabilin nga nawala. Sa Tibet usab, 16 ang natala nga namatay ug 546 ang gipangita pa. Nagsugod ang trahedya human sa glacial collapse nga nagpahinabo sa kusog nga pag-awas sa tubig, yelo, ug dagkong bato ngadto sa mga kabalayan ug mga walog.
Moabot na sa kapin 11,800 ka tawo ang natabang sa Nepal taliwala sa padayong search and rescue operations sa mga komunidad nga nahimulag tungod sa kadaot. Samtang, nagpadala na ang China ug Singapore og mga forensic experts, DNA kits, ug ubang kagamitan aron makatabang sa paspas nga pag-ila sa mga bangkay.