Gipasalig sa kapulisan sa probinsya sa Bukidnon nga luwas ug hapsay ang pagpahigayon sa mga aktibidad alang sa nagsingabot nga Semana Santa, dungan sa nagpadayon nga selebrasyon sa Kaamulan Festival.
Sa usa ka pakighinabi, gipahayag ni Police Colonel Oliver Sotto Navales, Provincial Director sa Bukidnon Police Provincial Office (BPPO), nga doble ang ilang gihimong pagpangandam tungod sa dungan nga dagkong mga okasyon sa probinsya.
Gipahugtan usab ang seguridad sa Bukidnon pinaagi sa pag-deploy og dugang mga personahe gikan sa Regional Office aron mabantayan ang dungan nga selebrasyon sa Kaamulan Festival ug ang pagsaulog sa Semana Santa.
Tungod sa gilaumang pagdagsa sa mga deboto ug turista alang sa ilang tinuig nga panaad, gisiguro sa kapulisan nga “covered” ang tibuok probinsya aron mamentinar ang kahapsay ug kaluwasan sa tanan samtang nagpadayon ang mga dagkong aktibidad.