Mihapak ang makamatay nga flash flood sa utlanan sa Nepal ug Tibet, China, human sa pagkahugno sa usa ka bahin sa glacier sa Himalayas nga mipahinabo og kusog nga pag-agos sa tubig, lapok ug mga bato ngadto sa ubos nga mga komunidad.
Sa eksklusibong pakighinabi sa Bombo Radyo Malaybalay kang Bombo News International Correspondent gikan sa nasod sa Nepal Ms. Divina Zabala gibutyag niini gibana-banang 8 hangtod 10 metros ang kataas sa tubig nga miresulta sa pagbaha human mabuak ang yelo sa maong lugar.
Wala pa usab mabalik ang komunikasyon ug suplay sa kuryente sa pipila ka lugar, hinungdan nga naglisod ang mga otoridad sa pagpangita sa mga missing nga residente.
Nagpabilin usab sa mga hagit sa rescue operation mao ang bukiron nga geograpiya sa Nepal, hinungdan nga kasagaran naggamit og mga helicopter ang mga rescuers aron makaabot sa mga lugar nga lisod sudlon.