Gisiguro sa Department of Agriculture-Regional Field Office X (DA-10) nga adunay igong suplay sa humay ning kasamtangan ug alang sa umaabot nga ani sa rehiyon, diin ang probinsya sa Bukidnon mao ang nanguna sa produksyon.
Matud ni Jose Apollo Y. Pacamalan, Regional Executive Director sa DA-10, nga taliwala anaa sa 83% ang sufficiency level sa humay sa Northern Mindanao, gibutyag niini nga kaarong bulan, gibanabana nga 15,418 ka ektarya sa rehiyon ang anihon.
Dugang pa, gibanabana nga sa Oktubre adunay 8,000 ka ektarya pa nga anihon nga humay sa Bukidnon ug ubang probinsya sa Northern Mindanao.
Gawas pa niini, adunay usab existing stock gikan sa pribadong sektor ug sa National Food Authority (NFA) nga makasiguro sa kalig-on sa suplay.
Gibutyag usab ni Pacamalan, nga ang Bukidnon mao ang nag una sa adunay staggered planting system nga nagpasiguro sa padayon nga pag-abot sa suplay sa humay sa merkado.
Tungod niini, mipasalig ang DA nga adunay igo ug lig-on nga reserba ang rehiyon.