Gisulong sa mga miprotestang residente sa Greenfields Subdivision ang buhatan sa Prime Water sa Malaybalay City aron direktang iduso ang dinalian ug permanenteng solusyon sa pipila ka bulan na nilang kalbaryo sa krisis sa tubig.
Sa pakighinabi sa Bombo Radyo Malaybalay kang Gavelino Aspe Jr., usa sa mga homeowners, iyang gipahayag nga napugos sila sa paghimo og lakang human walay klarong aksyon silang nadawat gikan sa hotline sa maong water service provider. Subay sa impormasyon nga gihatag kanila, naapektuhan ang suplay tungod sa pag-divert sa main waterline ug pagkunhod sa kapasidad sa water pump. Giitok sa mga residente nga gikinahanglan na nila ang dinalian nga kasulbaran tungod kay apektado na og maayo ang ilang pang-adlaw-adlaw nga panginahanglan ug personal nga kalimpyo.
Gipaluyohan usab ni City Councilor Jayson Chad Ayala ang gihimong lakang sa katawhan, diin iyang gitawag nga makatarunganon ang kasuko sa mga residente tungod kay nagbayad sila sa saktong obligasyon apan wala’y klarong serbisyo ug wala pa’y ipagawas nga cut-off advisory ang kompanya. Gidugang sa opisyal nga padayon ang ilang gihimong rasyon sa tubig gamit ang water truck sa kagamhanan, apan nakasugat kini og kalangan gumikan sa kapiot sa dalan sa subdivision, mga nakaparadang sakyanan sa kilid, ug pagkalubog sa tinubdan sa tubig tungod sa serye sa pag-ulan.