SHOWBIZ — Naghiusa ang P-pop groups nga BINI ug SB19 sa usa ka espesyal nga content collaboration didto sa Rohnert Park, California, isip pagpangandam sa ilang pagsalmot sa Summer Sonic Music Festival sa Japan.
Atol sa ilang pagtagbo, naghimo og mga bidyo ang duha ka grupo gamit ang ilang sikat nga mga kanta sama sa “Lawless” ug “Step Back.” Gipadayag sa mga miyembro nga sila si Colet, Aiah, Stell, ug Gwen nga suod silang maghigala sa luyo sa kamera ug tinuod nga nagsuportahay sa matag usa.
Gilauman usab sa duha ka kampo nga makatabang ang maong pag-uban aron maminosan o mahunong na ang giingong fan wars sa ilang mga tagsuporta sa social media.
Human sa ilang pagtagbo sa US, mopaingon na ang BINI ug SB19 sa Japan alang sa ilang gipaabot nga mga pasundayag sa Summer Sonic karong Agosto 14 hangtod 16.