Emosyonal ug mapasalamaton ang P-pop girl group nga BINI human giila sa Senado tungod sa ilang makasaysayanong pasundayag sa internasyonal nga music festival nga Coachella.
Ang tanang walo (8) ka miyembro sa grupo mitambong sa Senado niadtong Miyerkules diin giaprobahan ang Senate Resolution 370 ubos sa pag-sponsor ni Senador Bam Aquino.
Sa iyang pakigpulong, gipasiugda ni Aquino nga ang kalampusan sa BINI usa ka pruweba sa kaabtik sa mga Pilipino sa entablado sa kalibutan.
Daghang mga senador, lakip sila si Joel Villanueva, Raffy Tulfo, Erwin Tulfo, Risa Hontiveros, Jinggoy Estrada, Loren Legarda, ug Kiko Pangilinan, ang nagpahayag usab sa ilang suporta ug pag-ila sa grupo.
Sumala sa mga miyembro sa BINI, wala nila damha ang award ug hingpit nga nahingangha sa pagdawat sa Senado. Samtang, gipasiugda ni Hontiveros ang papel ni Mikha sa pagpalambo sa mental health ug safe spaces, labi na alang sa mga babaye.
Gipahayag usab ni Mikha ang ilang pasalamat sa pag-ila ug atensyon nga gihatag sa kaayohan sa mga artista.
Gipahayag usab sa grupo ang ilang panawagan alang sa dugang nga pagpalapad sa suporta alang sa mga Pilipinong artista ug mamugnaon, ug alang sa paghatag og dugang mga oportunidad sa OPM ug lokal nga talento sa tibuok kalibutan.