Nagpagawas og opisyal nga pamahayag niadtong Sabado, Mayo 9, ang Partido Demokratiko Pilipino kalabot sa migawas nga report mahitungod sa giingong warrant of arrest gikan sa International Criminal Court batok kang Senador Ronald Dela Rosa.
Sumala kang PDP Vice National Spokesperson Ferdinand Topacio, kon mapamatud-an nga tinuod ang maong warrant, usa na usab kini ka seryosong paglapas sa soberanya ug kagawasan sa Pilipinas isip usa ka independente nga nasud.
Gibatikos usab sa partido ang administrasyon ni Presidente Ferdinand Marcos Jr. tungod sa padayon nga pakigkoordinar niini sa ICC bisan pa sa pagbiya sa Pilipinas sa Rome Statute.
Sumala sa PDP nga ang gobyerno kinahanglan mopatigbabaw sa kaugalingong hurisdiksyon ug dili tugotan nga madaot ang dignidad sa nasud.
Dugang pa, dili angay nga molihok ang gobyerno isip “neo-colonial lapdog” sa Western powers.
Gipasiugda usab sa partido nga dili unta mausab ang ilang gihulagway nga kaduwagan ug pagbudhi nga nahitabo kaniadto batok kang Rodrigo Duterte.
Matud pa sa partido, si Senador Dela Rosa gipili sa milyun-milyong Pilipino ug angayan lamang nga mapanalipdan ang iyang mga katungod ug due process.
Gipasalig sa PDP nga gamiton niini ang tanang legal nga pamaagi aron depensahan dili lamang si Dela Rosa kondili usab ang katungod sa matag Pilipino batok sa giingong pang-abuso ug pamulitika.
Nanawagan usab ang partido sa publiko nga mosupak sa bisan unsang lakang nga giila nilang paglapas sa katungod sa katawhan, pinaagi sa mga paagi nga uyon sa balaod.