Nihuyang pa pag-ayo ang Philippine peso ug giila na karon isip labing huyang nga currency sa tibuok rehiyon tungod sa nagkagrabe nga tensyon sa Middle East.
Niubos kini og dul-an sa 4% ang balor sa piso batok sa dolyar, diin niabot na kini sa ₱60 matag dolyar, tungod sa dako nga pagsalig sa nasud sa pag-import og lana gikan sa gawas.
Nagpahimangno usab ang Capital Economics nga posible pang mosaka ang current account deficit sa nasud samtang nagkamahal ang presyo sa lana, butang nga mas makapadugang sa presyur sa balor sa piso.
Kini nga sitwasyon gilauman nga moresulta sa pagsaka sa presyo sa mga palaliton, gasolina, ug kuryente, ug bisan pa man og mas dako ang bili sa dolyar alang sa mga pamilya sa OFW, bawion ra gihapon kini sa kamahal sa inadlaw-adlaw nga galastuhan.