Miabot og halos 48-oras nga pagpangita sa usa ka halas ang usa ka 9 anyos nga bata sa Italy human maghimo og hulagway gamit ang artificial intelligence (AI) nga nagpakita og halas nga mogawas sa kasilyas.
Nahitabo ang insidente niadtong Nobyembre 12 sa Castelfidardo, Italy, diin gipakita sa bata saiyang mga ginikanan ang hulagway sa halas nga nagakamang gikan sa kasilyas.
Tungod sa pagtuo nga tinuod kini, nanawag ang iyang pamilya sa emergency services alas 8 sa gabii.
Gisusi sa mga bombero ang kasilyas ug ubang bahin sa balay, apan walay nakitang halas.
Nagpadayon ang pagpangita pagkasunod adlaw, uban ang mga opisyal sa Carabinieri Forestali nga nagdumala sa mga kaso sa mga langyaw ug protektadong mananap. Sa katapusan, nadiskobrehan sa mga opisyal nga hinimo ra sa AI ang hulagway.
Giangkon sa bata nga gigamit niya ang AI app aron idugang ang halas sa picture sa bowl ug gipatuo sa mga sakop sa pamilya nga nakakita siya niini. Nangayo usab kini og pasaylo sa mga opisyal tungod sa kagubot nga iyang nahimo.
Dili makaatubang og kasong kriminal ang bata tungod kay ubos pa kini sa 14 anyos, gumikan ang edad nga gikinahanglan aron manubag sa kriminal nga paglapas ubos sa balaod sa Italy.

