Nagsugod na pag-abot sa Cebu ang mga lider ug representante gikan sa nagkalain-laing nasod nga sakop sa Association of Southeast Asian Nations (ASEAN) alang sa ika-48 nga ASEAN Summit nga gipahigayon sa Lapu-Lapu City. Ang representante sa Myanmar nga si U Hau Khan Sum ang unang niabot niadtong Miyerkules, gisundan ni Sultan Hassanal Bolkiah sa Brunei ug ni Presidente Ferdinand Marcos Jr. Kagahapong adlawa, Huwebes, nangabot usab ang mga lider gikan sa Indonesia, Malaysia, Singapore, Thailand, Vietnam, Cambodia, Laos, ug Timor-Leste.
Sentro sa maong summit ang paghisgot sa mga mahinungdanong isyu sama sa energy security tungod sa nagkataas nga presyo sa lana sa tibuok kalibutan, food security aron masiguro ang igong suplay sa pagkaon sa rehiyon, ug ang disaster resiliency alang sa pagpalig-on sa koordinasyon sa matag nasod kon duna’y kalamidad.
Gilauman nga karong adlawa, Mayo 8, ang pormal nga panagtigom sa tanang lider diin sila magpagawas og hiniusang deklarasyon mahitungod sa seguridad ug ekonomiya sa Southeast Asia. Hugot nga seguridad ang gipatuman karon sa tibuok Metro Cebu aron masiguro ang kaluwasan sa mga bisita ug sa mga batan-on nga nanambong usab sa pipila ka bahin sa programa.