Gihatagan og pormal nga pag-ila ug komendasyon sa lokal nga kagamhanan ang 18-anyos nga football player nga si Jimm Leowell Sambalod-Fabela human sa iyang sunod-sunod nga talagsaong kalampusan sa natad sa paugnat sa kusog.
Si Fabela, nga lumad nga taga-Zone 16, Damilag, Manolo Fortich ug kasamtangang nagtungha ug nagdula alang sa FEU Diliman, maoy nagsilbing Team Captain sa iyang team. Iyang nasakmit ang talagsaong double-feat isip Kampeon ug Best Defender sa Secondary Boys Football sa Palarong Pambansa 2026, ingon man sa UAAP Season 88.
Sa usa ka pakighinabi, gibutyag sa batan-ong atleta nga dili sayon ang iyang giagian isip kapitan tungod sa language barrier o kalainan sa sinultihan sa iyang mga kauban nga gikan sa nagkalain-laing probinsya, gawas pa sa iyang mental nga pakigbisog ug kamingaw tungod kay layo siya sa iyang pamilya. Matud niya, lunsay nga disiplina, pagsubay sa sistema sa ilang coach, pag-ampo, ug ang iyang inahan ang nahimo niyang dakong motibasyon aron makab-ot ang maong dungog.
Naghatag usab og tambag si Fabela ngadto sa mga batan-on nga nangandoy nga mosunod sa iyang tunob, diin iyang gipahayag nga walay shortcut o mahika sa kalamposan kung dili kinahanglan ang seryosong training ug pag-amping sa kaugalingon batok sa injury nga mamahimong mobabag sa ilang mga pangandoy.