QUEZON, BUKIDNON — Balhog karon sa bilanggoan ang usa ka 30-anyos nga lalaki human kini nasikop sa gilusad nga drug buy-bust operation sa mga otoridad sa Barangay 5, Poblacion, Quezon, Bukidnon kagahapon sa tungang gabii, Hulyo 19, 2026.
Sa taho ni Bukidnon Police Provincial Office (PPO) Director Police Colonel Oliver Sotto Navales ngadto kang Regional Director Police Brigadier General Christopher Nortez Abrahano, nailhan ang dinakpan isip usa ka newly identified drug personality sa maong lungsod.
Nakuha gikan sa posisyon sa suspek ang lima ka pakete sa gidudahang shabu nga motimbang og 8.4 gramos ug duna’y Standard Drug Price nga mitala sa kapin 57 mil pesos (Php 57,120.00). Gawas sa maong iligal nga droga, narekober usab sa mga pulis ang gigamit nga motorsiklo nga Honda Bravo nga walay plaka ug ang singko siyentos pesos (Php 500.00) nga marked money.
Ang maong malampusong operasyon gipahigayon sa hiniusang pwersa sa Quezon Municipal Police Station ug 2nd Bukidnon Provincial Mobile Force Company, inabagan sa Provincial Intelligence Unit.
Kasamtangan nang nagtingkagol sa selda sa Quezon PNP ang suspek samtang giandam na ang pagpasaka og kasong paglapas sa Section 5 ug Section 11 sa Republic Act 9165 o Comprehensive Dangerous Drugs Act of 2002 batok kaniya. Ang mga nasakmit nga ebidensya gidala na usab sa Bukidnon Provincial Forensic Unit alang sa laboratory examination.