Babaye nasikop sa pagpangawat og P11,911 nga grocery items sa Valencia City

Nasikop ang usa ka 32-anyos nga babaye nga gituohang nangawat og mga grocery items nga nagkantidad og P11,911.75 sulod sa New Gaisano City Valencia kagahapong adlawa.

Matud sa Bukidnon Police Provincial Office, unang mipalit og mga produkto ang suspetsado, apan midugang pa kini og ubang grocery items ug gibutang sa iyang Gaisano ECO bag nga wala pa nabayri.

Sa paggawas niini sa establisemento, gisusi sa security guard ang iyang mga dala ug gipangayo ang resibo. Apan wala kini makapakita og balidong resibo alang sa mga grocery items, hinungdan nga gipugngan siya ug gitugyan sa Valencia City Police Station.

Anaa na sa kustodiya sa Valencia CPS ang suspetsado alang sa hustong disposisyon.