Nagpahiagyun ang civil society coalition nga Atin Ito Coalition og pinaka-una nga jetski flag ride sa dagat duol sa Pag-asa Island isip kabahin sa ilang ika-upat nga civilian mission sa West Philippine Sea.
Gipangulohan ni Dadah Kiram Ismula ang aktibidad, diin giingon sa grupo nga kini simbolo sa soberanya sa Pilipinas sa maong lugar.
Nagsugod ang misyon mga alas 5:40 sa buntag kagahapong adlawa, diin ang gamay nga grupo sa mga boluntaryo misakay og rubber boat sa wala pa gihimo ang jetski flag ride.
Matud sa Atin Ito, malampuson nilang naitaas ang bandila sa Pilipinas sa Pag-asa Cay 2 bisan pa sa giingong presensya sa mga barko sa China sa maong dapit.
Apan gi-report sa China Coast Guard nga ilegal ang gihimong pagsulod sa grupo sa ginaangkon nilang teritoryo, ug giingon nga adunay mga Pilipino nga namugna og aktibidad sa lugar.
Sa laing bahin, giingon sa mga awtoridad sa Pilipinas nga nagpadala sila og coast guard personnel human makadawat og report sa presensya sa mga Chinese personnel sa sandbar, ug ilang gi-monitor usab ang mga barko sa China nga giingong nag-operate sulod sa Philippine waters.
Dugang pa sa Atin Ito, usa ka barko sa People’s Liberation Army Navy nga Jiangkai II-class frigate ang miduol sa ilang grupo samtang nagpadayon ang aktibidad, nga miabot pa sa duol nga gilay-on sa ilang mga sakayan.
Nagsugod ang civilian mission niadtong Abril 30 ug molungtad hangtod Mayo 5, nga naglakip sa paghatag og pagkaon, gasolina, medical outreach, cultural activities, ug island tours sa mga komunidad sa lugar.