Gipaambit sa Philippine National Police – Criminal Investigation and Detection Group nga adunay impormasyon sila kung asa midiretso ang sakyanan nga gisakyan ni Senador Robin Padilla ug Senador Ronald dela Rosa pagbiya nila sa Senado niadtong kadlawon sa Mayo 14.
Matud ni CIDG Director Major General Robert Alexander Morico II, nasayod na sila sa destinasyon sa maong sakyanan apan dili pa nila ipadayag ang detalye samtang nagpadayon pa ang imbestigasyon.
Gitugyan usab sa CIDG ngadto kang PNP Chief Gen. Jose Melencio Nartatez ang paghatag og komento kalabot sa warrant of arrest nga gi-isyu sa International Criminal Court batok kang dela Rosa.
Sa karon, nagpadayon ang imbestigasyon sa CIDG may kalabotan sa nahitabong insidente sa pagpabuto og pusil sa gawas usab sa Senado.
Kahinumduman nga base sa CCTV footage, nakita ang pagbiya sa duha ka senador sakay sa sakyanan ni Padilla human sa tensiyon ug sunod nga pagpamusil tali sa OSAA ug mga operatiba sa National Bureau of Investigation.