Giduso ni Marikina 2nd District Rep. Miro Quimbo, Chairperson sa House Committee on Ways and Means, ang dinaliang pagtukod og national petroleum reserve ug pagpalig-on sa alternatibong mga tinubdan sa enerhiya isip tubag sa krisis sa lana.
Sumala kang Quimbo, ang kasamtangang krisis nga nahitabo nga gubat sa Iran kinahanglan magsilbing “wake-up call” para sa Pilipinas.
Gipasiugda niini, nga ang sobrang pagsalig sa nasud sa imported nga petrolyo maoy nagbutang sa ekonomiya sa peligro matag adunay geopolitical nga tensyon sa gawas sa nasud.
Gisugyot usab ni Quimbo, nga solusyon ang paspas nga pagpalambo sa mga lokal nga tinubdan sa enerhiya sama sa geothermal ug natural gas.
Gawas sa enerhiya, giduso usab niya ang pagtukod og kaugalingong imbakan sa lana sa gobyerno aron masiguro ang suplay ug mapabiling ubos ang presyo niini bisan sa panahon sa emergency.
Naglaum si Quimbo nga mahisgutan ug maaprubahan ang mga maong lakang sa dili pa ang adjournment sa First Regular Session sa unang semana sa Hunyo.
Ang maong panawagan misunod sa emergency meeting nga gipatawag ni Speaker Bojie Dy kauban ang 13 ka chairpersons sa lain-laing komite sa Kamara aron makabuo og nagkahiusang ug lig-on nga tubag sa gobyerno batok sa krisis sa presyo sa lana.