Gikonsiderar ni Presidente Ferdinand “Bongbong” Marcos Jr. nga posibleng hulga sa nasudnong seguridad sa Pilipinas ang alegasyon nga nakadawat og kuwarta gikan sa China si Bise Presidente Sara Duterte, hinungdan nga gikinahanglan kini og tukmang imbestigasyon.
Matud sa Presidente, kon mapamatud-an nga tinuod ang maong alegasyon, seryoso kini nga hulga sa soberanya ug seguridad sa nasud.
Tungod niini, gilauman niyang susihon sa Department of National Defense ang maong isyu.
Matud pa sa Presidente, mas makapahupay kaniya kon mapamatud-ang dili tinuod ang alegasyon.
Apan kon mapamatud-an kini, mahimo kining usa sa labing seryosong hulga nga giatubang sa Republika sa Pilipinas.
Samtang, gipahayag sa Presidente nga ang maong alegasyon may kalabotan sa soberanya ug kaluwasan sa estado.
Giklaro usab niya nga ang mga seryosong pasangil kinahanglan suportahan og ebidensiya.