Nibuwelta ang grupong Akbayan human gitawag ni Bise Presidente Sara Duterte nga “walay ebidensya” ug “lunsay nga politikanhong pag-atake” ang impeachment complaint nga ilang gipasaka batok kaniya.
Sumala sa Akbayan, ang maong reklamo gibase sa seryosong mga alegasyon sa paglapas sa Konstitusyon ug pagluib sa pagsalig sa katawhan (betrayal of public trust), ilabi na ang kontrobersyal nga paggamit sa confidential funds. Matud sa grupo, dili kini “pamulitika” kondili usa ka lakang aron panubagon ang mga opisyal sa gobyerno nga napakyas sa pagtuman sa ilang katungdanan.
Gihagit usab sa Akbayan ang Bise Presidente nga atubangon ang reklamo sa saktong venue sa Kongreso imbes nga tawgon lang kini nga pagpanggukod sa politika.
Kahinumduman nga niadtong Pebrero 2, 2026, pormal nga gi-endorso ni Akbayan Party-list Rep. Perci Cendaña ang impeachment complaint batok kang Duterte, nga giubanan usab sa uban pang progresibong grupo ug mga kabanay sa biktima sa “war on drugs.”