Gipadayag ni Bise Presidente Sara Duterte ning adlaw nga Biyernes, Marso 13, 2026, nga ang hangyo alang sa subpoenas sa mga dokumento, lakip na ang Statement of Assets, Liabilities, and Net Worth kon SALNs, isip kabahin sa impeachment proceedings, nagpakita nga wala’y igo nga ebidensya aron suportahan ang kaso batok kaniya.
Gisaway usab niini, ang aksyon ni House Deputy Minority Leader Chel Diokno, nga nangayo sa mga subpoenas ug posibleng pagkupot sa whistleblower nga si Ramil Madriaga.
Gitawag ni Duterte, kini nga ikatulo nga “fishing expedition” sa House, human sa mga naunang pagsulay atol sa 2024 budget hearings ug sa imbestigasyon sa House Committee on Good Government and Public Accountability.
Matud pa sa bise-Presidente, nga ang mga impeachment complaints, nga nagpasangil kaniya sa betrayal of public trust, pagpang-abuso sa P612.5 milyones nga confidential funds, ug mga hulga batok sa Presidente Ferdinand Marcos Jr. ug sa pamilya niini, politikal ang tuyo ug nagtinguha lamang sa pagpanalipod sa pipila ka indibidwal ug alang sa personal nga interes.
Dugang pa niini, nga ang padayon nga pag-atake sa Office of the President samtang nag-atubang ang nasud sa tensyon sa Middle East, usa matud pa ka insulto sa mga OFW, kabus, ug mga pamilya sa Pilipino nga naapektohan sa krisis.
Giinsistir niini, nga ang impeachment complaint usa ka politikal nga atake ug dili tinuod nga pagpangita sa hustisya.