Gimando na ni Francisco Laurel Jr., kalihim sa Department of Agriculture (DA), ang pagpahugot sa monitoring sa presyo ug suplay sa bugas kasunod sa nagkakusog nga gyera sa Middle East.
Sumala kang Arnel De Mesa, tigpamaba sa DA, sugod sa sunod semana kinahanglan na ang mas hugot nga pagmonitor sa mga baligya-anan ug mga bodega sa bugas aron masiguro nga adunay igo nga suplay ug malikayan ang pag-abuso sa presyo samtang ginabaligya kini sa merkado.
Gipaabot usab niini, nga kanunay nga maglibot ang mga team sa DA sa mga merkado aron bantayan ang presyo sa bugas, ilabina sa mga lugar nga taas ang konsumo.
Sa pakakaron, nagsugod na ang harvest season ug magpadayon ang daghang supply sa lokal nga bugas hangtod sa bulan sa Abril, busa gilauman nga magpabiling taas ang stock sa bugas sa Pilipinas.
Alang sa imported rice, nagpabilin nga pinakadako nga supplier sa bugas ang mga nasod sa Southeast Asia sama sa Vietnam, Cambodia, ug Myanmar.
Gumikan dili dako ang gasto sa transportasyon gikan sa maong mga nasod, wala usab gilauman ang dako nga pagsaka sa presyo sa imported rice sa dihang moabot kini sa Pilipinas ug ibaligya sa lokal nga merkado.
Matod pa sa DA, kung maapektuhan man ang imports, posibleng sa freight cost lamang makita ang epekto, nga mahimo’g magdala og domino effect sa lokal nga presyo.
Sa kinatibuk-an, gipasabot sa DA nga ang bisan unsang pagsaka sa presyo sa bugas kinahanglan magpabiling makatarunganon ug proportional, bisan pa sa nagpadayon nga kagubot sa Middle East, ug padayon kini nilang bantayan sa mga mosunod nga adlaw.