Naglusad ang Israel og bag-ong serye sa mga pag-atake batok sa Lebanon ug Iran sa ikapitong adlaw o usa ka semana sa gubat sa Middle East.
Gikumpirma sa Israeli Defense Forces (IDF), nga ilang gilusad ang halapad nga air strikes sa kapital sa Lebanon nga Beirut , nga gitumong ang mga lugar sa Hezbollah.
Lakip niini ang command centers ug multi-story buildings sa kapital, ingon man ang mga pasilidad diin gi-imbak ang mga drones sa militanteng grupo, nga gigamit sa ilang mga atake batok sa tropa ug estado sa Israel.
Sumala sa IDF, miabot na sa 26 ka serye sa strikes ang ilang gihimo sa Dahiyeh area sa Lebanon, usa ka suburb sa habagatan sa Beirut nga kadaghanan Shia Muslim ang nagpuyo.
Gitan-aw sa Israel ang maong suburb ingon nga kuta sa Hezbollah.
Nagresulta kini sa bag-ong kahadlok ug panic sa mga residente human i-anunsyo sa militar sa Israel ang pag-evacuate sa halos tanan nga naa sa southern Beirut.
Tungod niini, misaka ang death toll gikan sa mga pag-atake sa Israel sa Lebanon karong semana ngadto sa 123 ka tawo samtang 683 ang nasamdan, base sa datos sa Lebanese Ministry of Public Health.
Bag-ong mga pagbusikad usab ang natala sa kapital sa Tehran, diin base sa taho sa state media, naigo ang usa ka shopping street pila ka oras human i-anunsyo sa Israel ang halapad nga pag-atake sa Iran.
Sumala sa Iranian state media, miabot na sa 1,045 ang nangamatay sa Iran sukad gisugdan sa Israel ug Amerika ang joint attack.