Napatay ang Armed Forces Chief of Staff sa Iran nga si Abdolrahim Mousavi, uban ang pipila ka mga taas nga opisyal sa militar, human sa gipahigayon nga airstrike sa United States ug Israel batok sa maong nasod.
Base sa listahan nga gipagawas, lakip sa mga nakabsan sa kinabuhi mao sila si Defense Minister Aziz Nasirzadeh, Revolutionary Guards Chief Mohammad Pakpour, ug Defense Head Ali Shamkhani.
Nahitabo ang maong mga pagpamomba samtang nagpahigayon ang mga opisyal og usa ka “defense council meeting” isip pagpangandam batok sa pag-atake sa US ug Israel.
Sa usa ka bulag nga airstrike, napatay usab ang Police Intelligence Chief sa Iran nga si Gholamreza Rezaian.
Isip balos, naglunsad ang Iran og bag-ong hugna sa mga missile ug drone attacks nga nagpunting sa mga military base sa US sa rehiyon ug sa nasod sa Israel.
Gihimo kini sa Iran isip panimalos sa giingong pagpatay sa ilang Supreme Leader ug sa uban pang mga opisyal sa gobyerno.
Lakip sa mga gi-target sa Iran mao ang 27 ka base sa US sa tibuok rehiyon, ang military headquarters sa Israel, ug usa ka defense industries complex nga nahimutang sa Tel Aviv.
Nagpabilin nga init ug delikado ang sitwasyon sa Middle East samtang nagpadayon ang binayloay og kalayo tali sa magkaatbang nga kampo.